কিন্তু ২০২৪ ৰ লোকসভা নিৰ্বাচনত ভাৰতৰ ৰাইজে তেওঁলোকৰ সেই ভুল ভাঙি দেখুৱালে। যি বিজেপি ৪০০তকৈ ওপৰত লোকসভা সমষ্টি জিকিব বুলি ৫৬ ইঞ্চিৰ বুকু ফিন্দাই আছিল, সেই বেলুন ৰাইজে ফুটাই দেখুৱাই দিলে। মহানায়ক মহাশক্তিৱান মোডী ডাঙৰীয়াই আজিও প্ৰেছ কনফাৰেন্স কৰিবলৈ অপাৰগ। তেওঁ ‘আম কেনেকৈ খায়’ জাতীয় সাক্ষাৎকাৰতহে বেছি আগ্ৰহী। লোকসভা নিৰ্বাচনৰ ফলাফলেৰে ৰাইজে বিজেপি আৰু এই গোডী মিডিয়াক দেখুৱাই দিলে যে গণতন্ত্ৰত জনতাই ৰজা।

ন্যায়িকভাৱে যুঁজিব নোৱাৰিব জানি বিজেপিয়ে চিবিআই, ইডি, কেগ আদি বিৰোধীৰ বিৰুদ্ধে ব্যৱহাৰ কৰিলে। তেওঁলোকক যিয়ে দুৰ্নীতি কৰাত বাধা দিছে, তাকেই জে’লত ভৰাইছে, নহ’লে কেন্দ্ৰীয় সংস্থা ব্যৱহাৰ কৰি বিপৰ্যস্ত কৰিছে। আজিৰ বিজেপিক দল নুবুলি এটা ৱাশ্বিং মেচিন বুলি কোৱাতোহে যুগুত হ’ব। এফালেৰে দুৰ্নীতিগ্ৰস্ত মানুহ সোমাইছে, আৰু আনফালেৰে হোৱাইট ৱাশ্ব হৈ ওলাই আহিছে।

শিক্ষাখণ্ডৰ কথাই যদি কওঁ, বিজেপিয়ে ৰাষ্ট্ৰীয় শিক্ষা নীতি ব্যৱহাৰ কৰি ছাত্ৰ-ছাত্ৰীৰ জীৱনকলৈ কেৱল হেতালি খেলিছে। তেওঁলোকৰ শিক্ষাত ছলে-বলে-কৌশলেৰে নিজৰ এজেণ্ডা সোমাবলৈ আপ্ৰাণ চেষ্টা চলাইছে যাতে তেওঁলোকে নতুন প্ৰজন্মক পুতলাৰ দৰে ব্যৱহাৰ কৰিব পাৰে। চৰকাৰ এখন কিমান নীচ হ’লে কণ কণ ল’ৰা-ছোৱালীৰ সৈতে খেলিব পাৰে, সেয়া কল্পনা কৰক। তাৰোপৰি শিক্ষিত যুৱপ্ৰজন্মৰ বিকাশ কৰিব বিচৰা চৰকাৰে আজিও ৩০ লাখ পদৰ ভৰ্তি কৰা নাই। ইয়াৰ বিপৰীতে ৰাজহুৱা সম্পত্তিক কি প্ৰকাৰে পুঁজিপতি গোষ্ঠীক পানীৰ দৰত বিক্ৰী কৰিব পাৰে, তাতহে দলটো সিদ্ধহস্ত হৈ উঠিছে। তদুপৰি ৰাইজে ইলেক্ট’ৰেল বণ্ড, পিএম কেয়াৰ ফাণ্ড আদিৰ কথাও নিশ্চয় পাহৰা নাই।